ജര്‍മന്‍ ചാന്‍സലര്‍ ഒലഫ് ഷോള്‍സ്, ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍, ബ്രിട്ടീഷ് പ്രധാനമന്ത്രി കെയര്‍ സ്ററാമര്‍ എന്നിവര്‍ സംയുക്ത പ്രസ്താവനയിലാണ് തിങ്കളാഴ്ച ഇറാനോട് സമാധാന ആഹ്വാനം നടത്തിയത്. എന്നാല്‍, തങ്ങളുടെ രാജ്യത്തു വച്ച് ഹനിയയെ വധിച്ചതിന് തിരിച്ചടി നല്‍കാനുള്ള അവകാശം രാജ്യത്തിനുണ്ടെന്നാണ് ഇറാന്റെ പ്രസിഡന്റ് മസൂദ് പെസഷ്കിയാന്റെ നിലപാട്. ഭാവിയില്‍ ഇത്തരം കുറ്റകൃത്യങ്ങളും അതിക്രമങ്ങളും തടയാന്‍ ഇത് ആവശ്യമാണെന്നും ബ്രിട്ടീഷ് പ്രധാനമന്ത്രി സ്ററാമറുമായി നടത്തിയ ടെലിഫോണ്‍ സംഭാഷണത്തില്‍ അദ്ദേഹം വ്യക്തമാക്കി.
ജൂലൈയിലാണ് ഇറാനിലെ പുതിയ പ്രസിഡന്റിന്റെ സത്യപ്രതിജ്ഞാ ചടങ്ങിനു ടെഹ്റാനിലെത്തിയ ഹനിയ വധിക്കപ്പെട്ടത്. എന്നാല്‍, ഈ കൊലപാതകത്തിന്റെ ഉത്തരവാദിത്വം ഇസ്രായേല്‍ ഏറ്റെടുക്കുകയോ നിഷേധിക്കുകയോ ചെയ്തിട്ടില്ല. ഇതിനു പിന്നാലെ ലബനനില്‍ ഹിസ്ബുല്ല കമാന്‍ഡര്‍ ഫുആദ് ശുക്റും ഇസ്രായേല്‍ ആക്രമണത്തില്‍ കൊല്ലപ്പെട്ടിരുന്നു.
സംഘര്‍ഷ സാധ്യത മുന്‍നിര്‍ത്തി മേഖലയില്‍ അമേരിക്ക സൈനിക വിന്യാസം ശക്തിപ്പെടുത്തിയിട്ടുണ്ട്. കൂടുതല്‍ യുദ്ധക്കപ്പലുകളും അന്തര്‍വാഹിനിയും മേഖലയില്‍ വിന്യസിച്ച യു.എസ് ഇസ്രായേലിന് പ്രതിരോധമൊരുക്കുമെന്ന് പരസ്യമായി പ്രഖ്യാപിച്ചിട്ടുണ്ട്. അതേസമയം, ഗസ്സയില്‍ വെടിനിര്‍ത്തല്‍ പ്രഖ്യാപിച്ചാല്‍ തിരിച്ചടിയില്‍നിന്ന് വിട്ടുനില്‍ക്കാമെന്ന നിലപാടും ഇറാന്‍ അറിയിച്ചതായി റിപ്പോര്‍ട്ടുകള്‍ പറയുന്നു.
Comments: